بخصوص التصريح ديال وزير الفلاحة البارح، اللي قال فيه بأنه من بعد ثلاث سنوات غادي نولّيو نقلبو فين نجيبو مطيشة المغرب، بسبب تراجع الإنتاج والمساحة المزروعة، اللي نقصات من 8000 هكتار إلى 4000 هكتار، إضافة إلى الأمراض والتقلبات المناخية، والضغط على الموارد المائية، بغيت نوضح واحد النقطة مهمة من واقع الميدان.

بصفتي فلاحة ومصدّرة، بغيت نقول ليكم واحد الحقيقة: ملي كتسمعو بأن المساحة اللي كانت كتزرع فيها المطيشة نقصات من 8000 هكتار إلى 4000 هكتار، ما خاصكمش تفهمو بأن الفلاحين كاملين تضررو أو خرجو من القطاع بسبب الظروف المناخية والأمراض فقط.

الحقيقة أن جزءاً كبيراً من الفلاحين ولى كيقلب على زراعات أخرى أكثر مردودية من الناحية المادية، وأقل تكلفة ومخاطرة.

اليوم كاين توجه متزايد نحو زراعات بحال الميرتيل (Myrtille)، والفرامبواز (Framboise)، والفريز (Fraise)، وغيرها من المنتجات اللي ولات كتقدم فرصاً اقتصادية أفضل لبعض المستثمرين والفلاحين.

الفلاح في نهاية المطاف مستثمر، وعندو مصاريف ويد عاملة وماء وأسمدة ومبيدات ومخاطر، ومن الطبيعي يقلب على المنتوج اللي يضمن ليه مردودية أحسن.

إذن، ماشي كل نقص في المساحة المزروعة بالمطيشة معناه أن المغرب فقد القدرة على إنتاجها، ولكن خاصنا نفهمو كذلك علاش الفلاح ولى كيتخلى عليها وكيختار زراعات أخرى.

هادشي كلام من واقع الميدان، وماشي مجرد تحليل من بعيد.

معكم سكينة، فلاحة ومصدّرة ومديرة محطة التلفيف هرماس بيو (Hermas Bio).