الرئيسية
أرواح عديدة طاحت تحت الردم، وراه الرقم مرشح يطلع. ماشي زلزال، ماشي كارثة طبيعية…
هادي جريمة عمرانية، موقعة دموية ديال مافيا العقار اللي كتجري ورا الربح السريع بحال الضبع، وكتخلي البشر يموت تحت الإسمنت المغشوش.
فين كانو المسؤولين؟ فين كانو اللي كيوقعو الرخص؟ اللي كيسدو عينيهم على الخروقات؟ اللي كيسكتو على البنايات اللي كتشيد بلا مراقبة؟ واش ماشي هادوك اللي كيستقبلو "الشكارة" وكيخليو الناس يسكنو فالقبر قبل ما يموتو؟
الوالي حضر، ولكن واش غادي يشوف بعينيه حجم الكارثة؟ واش غادي يحس بالبرد ديال الليل اللي كيدوزوه رجال الوقاية المدنية كيقلبو على جثث؟ واش غادي يسمع صراخ الأمهات اللي ولادهم تبلعوهم الردم؟ ولا غادي يرجع للمكتب ديالو ويكتب تقرير كيبرّد الخاطر؟
حي المسيرة ماشي استثناء، راه النموذج ديال مدن كاملة كاتبني فوق الغش، فوق الرشوة، فوق الدم. واللي ساكت اليوم، راه شريك فالجريمة ديال غدا.
