رأي

فاطمة وشاي: المشكل ماشي فالمواطن اللي ما عندوش.. المشكل فالغلاء اللي خليتو الفنادق تزيد فيه بلا حسيب ولا رقيب

فنانة/ نائبة برلمانية (العدالة والتنمية)

السيد الوزير تمنيت كون فكرتي قبل ماتصرح بهذاك التصريح المستفز والي يدعوا للتفرقة وتمنيت كون عرفتي مع من؟ وخصوصا ملي تكون كتكلم مع لمغاربة، حسبها قبل ماتخلي لسانك يتطاول على المواطنين بالميز والتفرقة ومايبقاش مسيطر على عقلك بعض المخططات الي كيفكروا فيها وكيحلموا بها شي وحدين ! وتنفلت من لسانك بعض الاساءات الي من بعد ترجع تبررها راه لمغاربةهادو السي لوزير.

مراكش ماشي فيلا ديالك باش توزعها على اللي بغيتي، أو ضيعة ديالك وارثها باش تضايف فيها الي بغيتي وتسد الباب على الي ما عاجبك . 

مراكش مدينة مغربية، كيحكمها أميرالمؤمنين محمد السادس حفظه الله وأدام عزه.

 مراكش عندها تاريخ والمغاربة كلهم عارفينو أبناؤها، ولاد الشعب وكيستمدوا شعبيتهم وثقافتهم من جامع لفنا 

ومن الكتبية، ولوداية وجميع المعالم التاريخية وفيها جميع الحرف، فيها التاريخ ديالنا كاملين. ومانقبلوش يوجهنا شي حد بسبب الحاجة او الهشاشة إلى وجهة اخرى

والحوز ماشي منفى ديال الفقراء!

الحوز ناس العز والكرم، ناس اللي وقفوا فالزلزال وصبروا، وصمدو وحتى لدبا باقيين صامدين علحقاش علاقتهم بأرضهم وجبالهم وويدانهم اكثر من حبهم لأولادهم ولأرواحهم ،ماشي الحوز رخيص عل ناسو باش يولي اليوم هو"البديل للي ما عندوش باش يخلص أوطيل فمراكش.

المشكل ماشي فالمواطن اللي ما عندوش، المشكل فالغلاء اللي خليتو الفنادق تزيد فيه بلا حسيب ولا رقيب، ونتا كوزير جاي تدافع عليهم وتقول "العرض والطلب"؟

واش نتا وزير ديال الفنادق ولا وزير ديال المغاربة؟

الوزير الحقيقي كيقلب على الحل: كيفاش نوفر عروض فمتناول الجميع، كيفاش نحميو القدرة الشرائية، كيفاش نخلي ولد الشعب تا هو يدوز عطلة فبلادو بكرامة.

ماشي كيقول ليه: إلا ما عندكش الفلوس سير بعد من هنا!

السيد الوزير، المغرب ماشي أوطيل، والمواطن ماشي زبون زايد.

مراكش وفاس ووووو ،ومن طنجة لكويرة ديالنا كاملين، والحوز ديالنا كاملين، ومدنا المغربية لينا كاملين واللي ما عندوش الفلوس راه مغربي تا هو ، وعندو الحق يتمشى فبلادو فين ما بغات خاطرو بديتوا بفلتات الالسنة جمعوا روسكم علينا الله يهديكم.