رياضة

أيت بن يدر شوية ديال الهدوء لأن الشخصية ماشي هي التسلط والصرامة ماشي هي إهانة اللاعبين أمام الكاميرات

منعم بلمقدم (ناقد رياضي)

صراحة، وأنا اتابع واحد الفيديو ديال السيد أيت بن يدر، والتصرف ديالو مع اللاعبين بعد نهاية المباراة، وخاصة مع الزهراني، أقل ما يمكن أن يقال عنه إنه تصرف سلطوي وصبياني.

 

تقولي خاصو يكون صارم، نقولك أنا من الناس اللي كيطالبو بهذا النوع من الصرامة تقولي بغيناه يكون عندو الشخصية، نقولك هادي من أفضل الحوايج اللي ممكن تكون عند أي مدرب ولكن داك التصرف راه ما كيدخل حتى فخانة من هذو.

 

المباراة سالات والمنتخب تأهل، وعلاش باقي تصبن فيهم؟ تجبد وتدفع قدام الكاميرات؟ واش ما كانش ممكن تصفق ليهم، وتشجعهم، وتعانقهم، وتحيي الجمهور، وتخلي الملاحظات ديالك للفيستيار؟ ورا ماشي ضروري تزعف وتدفع وتجبد وتصبن وتخرج داك الغسيل الداخلي قدام الناس.

 

علاش غادي تهرس نفسية لاعب في هذا العمر؟ وعلاش غادي تخلينا كاملين نوجهو له أصابع الاتهام؟ وكيفاش غادي تكون النفسية ديالو من بعد ما يشوف هذا الفيديوهات منتشرة؟ وكيفاش سوقت الصورة ديالو قدام زملائه فالنادي ديالو وقدام المدرب ديالو؟

 

خلاصة القول، تصرف هاوي بكل المقاييس أما الفوز مع هاد الجيل، راه يقدر يوقف عليه محلل ماشي بالضرورة مدرب، خصوصا فبحال هذا المباراة وغادي يغلب

 

ومطلبي من السيد أيت بن يدر شوية ديال الهدوء، لأن الشخصية ماشي هي التسلط، والصرامة ماشي هي إهانة اللاعبين أمام الكاميرات