لقلوب فايضة

من شي وحدين

شخيرهم عامر

فيق الموتى ف لمقابر

وكذوبهم...

دود ف الوذنين..!!

مفارضين في خرافة

ونص لحية.. على زلافة

وحافظين .. آش حافظين

مجلدات من لكذوب..

و جوج كلمات ف الدين..!!

*******

الناس غارقة ف الهم

وهوما.....

نصبو الشباكي

وطفاو الضو

وكلسو ف الظلمة

كلاو الغلة..

وضربو الطم..

ثوب السترة تقطع

وعرق الحكرة..

عمر حتى تفركع..

فاض الدم

وجمدت البسمة ف الفم

وصوف العمش ف العينين...!!!

وطيور المحنة..

لا مجي بكري

لا وجه طلع عليه الزين...!!!

******

كذبو كذبة وصدقوها

كاع البيبان طرقوها

حلمو براسهم..

شراو لبلاد ووثقوها

وحيت سطابو...

السلطة والرياسة

ونساو البردعة والحلاسة

هجمو على الزرقة و لكراسى

جناو فلحظة شقى سنين

داوها حب وتبن

ومازال طامعين..!!!

******

طلقو عود الريح بلا شكيمة

وعطاو لصناع الويل..

همة و قيمة

ووقفو ف كنازة لبلاد مصافين..

دمصو لوراق

و طواو الطرحة

وندمو لقلوب

لي تشهات الفرحة..

شافهم الليل..

كحل بالعمى

وشافهم النهار...بكى

حتى فيق الموتى والحيين..!!!

* 2021..في أمان الله..