[ kafapress.ma ] :: الصنعاوي بوعزة: الْكركُوز
Hautأعلى الصفحة
الرئيسية
الخميس 15 نونبر 2018 العدد : 2769

الصنعاوي بوعزة: الْكركُوز

C??EC?E    ?IE? ?I??C    FaceBook      
رأي
| 24 فبراير 2018 - 15:10

الْكركُوز

بين ضحكي وبْكايَا حُرت مْنين نبدا القصة ..

وُكيف انُّج لَك لَحكايَة .

حكاية فيها أنا فيها انتِ ..

حكاية فيها حثى انتَايَا .

فالاول بْديتْ ..

اجمعت شِي احريفات وُ عديتْ كَان الَقلم ونيس ..

وكانت الورقة عَزبَة حْدايَا .

قلت من حُرقتي نَبدا ..

قلت .. عْلاشْ من حُرقتكم ما تكونش لَبدايَا ؟

 ااااااحَيْ .. منين نبدا لكم هاد لَحكايَة .

غير البارح قلت نبدا انْبَتْ الرقيب حدايَا .

شَتْ الروس مقطوعة والدم امحقَن حْدايَا .

قلت نَهدا .. نبدا نبدا .. نهدا نهدا .. نهدا نبدا ..

نبدا نبدا نبدا نْدير غُرزَة نْدير نَفْدَة ونْعاود تاني من تاني انُّج ونبدا

 ووجع لكتابة يطول يطـــــــــــــــــــول ونرجع تاني ونقول اااااحَيْ منين نبدا لحكاية ؟

 هْي حكاية خيط من الشعَا ..

واتلاح فجوف لمرايا .

هي حكاية حفنة امْبَّرعَة ..

هي حكاية قومان عْرايا .

هي حكاية وَطن تلَّفْ انسان ..

هي حكاية انسان تلف راس لحكايَة .

 اااااااحَيْ منين نبدا لحكايَة ؟

هي حكاية كَركوز عاش مْشرف مَعزُوزْ فِينمَا مَد ايدُو يْحوزْ . فينما مَد رجلُو يْدُوزْ .

قُول كانت الحجرة اتشق ..

وينبت لُو منها اللُّوزْ .

تسولوني عْلى زمانُو ..

كانت ايام الخــــــــــــــــوفْ يسولوني عْلى مكانُو ..

رَاها ارضو على حَد الشوفْ تسولوني عْلى ايمانو ..

كانت لَغنم قول كانت لَقبايل ..

ادَّز راسها وتهديه الصــــــــــــــــــــــــــــــــــــوفْ والصوف يااااالصوف ..

الصوف غير معنى ومْعاني من الصوف قوم ربحات ..

وفالصوف قومان تْعاني صوفنا لكانت نوادر وجبالْ .

ديك لِنتفها الراي والْكَبَالْ .

ونتفتها ديك السَّوطَة لعَالْبالْ .

الصوف حلم ..

وقبل ما نحلموه ادبالْ .

حلم قايل ركبت عَالَهبالْ .

فرطت فصوفها وجلست عَالَكبالْ.

تشوي واتكدَّدْ .. تْمُص واتلدَّدْ وتقول .. احنا كنا قبايل على بالْ .

وُكل قبيلة عندها كركوز مْقدماه .

وُكل كركوز عندو شلَّى خيوط مخدماه .

ولِتكلم فالكراكيز .. قالو تيبري عْلى عْماه .

ياك الكراكيز سرقت ارض ربي ..

اليوم رجعت تتحكم فسماه .

هاكو هاكو الَحكاية كملوها انتوما راها فبلادكم مَرْشومَة.

راها فجلدكم مَوشومَة .

وايَّاكم تحشمو .. وايَّاكم يقولو لكم .. رَا لكمالة احشومَة .




مواضيع ذات صلة


الاتصال بنا

© جميع الحقوق محفوظة 2011
جريدة إلكترونية مستقلة تصدر عن الشركة kafapresse - S.A.R.L
الإيداع القانوني طبقا لقانون الصحافة والنشر المؤرخ بتاريخ 10غشت 2016: عدد 1 - 017 ص ح
Patente : 25718014 - RC : 104901 - I.F : 3370680 - CNSS : 4111829 - ICE : 001799721000071