الرئيسية
( شوف مزيان ف لبلايك ليقدام المدرسة )
هاذ الوطن علينا عزيز
وطالبين ليه التسليم .
شفنا وزارة التجهيز
فبلايكها ..
عارفة حال التعليم .
ها أنت شوف
بلا دهشة بلا خوف
ف لبلاكة اللولى
ملي كانت لبلاد ع المدرسة معولة
" ولد مع بنت
ها زين لكتوب
وغاديين لقراية "
ف لبلاكة الثانية
الدنيا هانية
" ولد تابع بنت
لايحين لكتوب
وتيجريو عراية"
صبرنا .. تقنا
وعينا .. عقنا
رگدنا .. فقنا
لقينا مغرب مسقي
ومغرب باقي بور .
قراية بالفلوس
ومدرسة فابور .
والحرف لتولد
يحلف عندنا لا بات .
سدينا المكتبة
وحلينا المحلبات .
كذبنا الطّبة
ونشرنا الرقية ولحجابات .
ياااا خييي
كانت عندنا مدرسة وحدة
قول مغرب واحد .
وحل منا بطريق الوحدة
ولا حد منا كان بالوطن جاحد .
ونعقل ..
كانو الناس بحال الناس
ذهب مزوج نُقرة .
وكانو يضربو البقالة والفاس
ومأمنين ايمان الفُقرة .
لكن عارفين لبغى يخدم
خاصو يجتهد ويقرا .
وعفاك اااا خييي
لاتبكي لا تنوح .
ويلا هاج هاذ البر
وغرقت السفينة بنوح .
انا ما باغي بحر
ما طامع ف فلايك .
ما طالب منك جيم
ولا تزيدني لايك .
انا بغيتك ترد المحفظة
للتلاميذ ف لبلايك .
( وشوف مزيان ف لبلايك ليقدام المدرسة)
